كأس الامم الافريقيه.... زغرطى يااما!!!

كأس الامم الافريقيه

كل مصر تقريبا شافت الماتش وكانت متابعه مصر وفرحت لما خدنا الكاس للمره التانيه ورا بعض والمره السادسه فى تاريخ الكأس

الناس كانت مزقططه اوى وانا معاهم كنت فرحانه طحن

بس شويه وعادى ورجعت تانى افكر فى هموم اللى هى هموم كل اللى قدى هشتغل ايه لما اتخرج مستقبلى ازاى هعمل ايه ياه غزه لسه بتضرب ياعم فكك بقى من الكلام ده احنا فى ايدنا حاجه ومعملنهاش طيب ادونى سلاح وانا اروح اموت هناك احسن من العيشه دى بس هو فين

الا واخرجلك الشاع الاقى الدنيا لسه مقلوبه والناس فرحانه وهيصه وزحمه قولنا يلا الناس فرحانه ولو ان الناس اتجمعت اهى ولما الحاجه تغلى محدش بيقول بخ ويقولك مفيش راى عام طيب عديها بقى الناس فرحانه

اللى يغيظ بقى ان الماتش خلص واليوم عدى والناس لسه بتجرى فى الشارع من الفرحه وقال ايه سايب كليته والى سايب شغله ورايحين يستقبلوا المنتخب وقال قالك الحق فى تلاته ماتوا طيب ماتجوزش عليهم الا الرحمه

فوقفت لوحدى وقلبى دم بيبكى على حالنا وسالت هما راجعين بايه قالولى جاهله راجعين بكاس الامم

قولت اللى يشوف حالكم يقول دول راجعين بمفاتيح الاقصى ولا حرروا بغداد ولا حتى اسعار الاكل رخصت شويه ولا طيب قولى شوارع مصر هتنضف ولا العشوائيات هتلاقى حد يصلحها ولا ولادنا هيتعلموا تعليم ليه لازمه ولا خدنا موقف جاب نتيجه وغزه رجع ليها النور ولا قولى كل شاب هيبقى عنده شغلانه محترمه بمرتب يكفى وشقه ولا قولى اى حاجه ليها لازمه

دى الكوره فى كل دول العالم صناعه وعندنا صياعه ولا نسيت ياقلبى صفر المونديال

داانا كنت بكاس الامم زيك فرحان بس لما لقيتكم بتجروا وكأن العرب صحيوا قلبتوا عليا المواجع ربنا يسامحكوا

ارجع ياعم انت وهو كل واحد يشوف شغله اللعيبه ديا جالهم تبرعات بالكوم تقولش غلابه ولا عايزين يعملوا عمليه ولا تقولش محاربين قدامى ورايحين بلد الرشيد يقولوا للامريكان يلا من هنا ياض انت وهو

قوم قوم دور على لقمة عيشك وكمل دوران فى الساقيه